Во петок промоција на „Чист Хероин“ од гостиварецот Дејан Крстески

На 21 септември (петок), во галеријата „Култ“ во Гостивар, ќе се одржи промоција на збирката раскази „Чист Хероин“ од гостиварецот Дејан Крстески, во издание на ПНВ Публикации.

Во „Чист Хероин“ се поместени 40-тина раскази, во кои се мешаат безброј општочовечки потраги и филозофски прашања со длабоки лични знаења и доживувања на низа разбранувани емотивни состојби. Авторот и покрај нивната комплексност, успева  едноставно и јасно да ги објасни, така што ништо не ја запира пораката да стигне дирекно до читателот. Писателот на еден надреален и фантастичен начин, отсликува еден поинаков свет, во кој ограничувањата се измислен конструкт, а темнината е во секој од нас.

Дејан Крстески е добитник на многу литературни награди и признанија, меѓу кои и наградата за една од најчитаните книги во 2017 година од страна на Македоника и Унеско за книгата: „Луѓе без лица“. Песната, „Последната книга“, беше избрана за една од најдобрите творби, по повод „Ден на Читателот“, од страна на НУБ „Климент Охридски- 2017“.

Збирката раскази „Чист Хероин“, која е трето книжевно остварување на авторот, неодамна беше промовирна во Скопје. Промоцијата во Гостивар започнува во 19 часот.