Со радост и песна најавено Христовото раѓање – Бадникова поворка 2019 во Гостивар (фото)

Студеното време не ги спречи дечињата во голем број да бидат дел од Бадниковата поворка во Гостивар и со песна да го најават Христовото раѓање. Малите ангелчиња со ѕвезди во рацете, тргнаа од црквата „Пресвета Богородица“ на градскиот плоштад, поминаа низ улиците „Илинденска“ и „Гоце Делчев“ и завршија во црквата „Св.Петка“, кај железничката станица. Носејќи ја Витлеемската пештера на чело на поворката, ја проширија радосната вест за раѓањето на спасителот меѓу верниците. Придружувани од свештенослужителите од гостиварското архиерејско намесништво, со радост и со гордост ја пееја коледарската песна Вечниот Бог.

Бадниковата поворка во Гостивар годинава се одржа по четврти пат. Настанот го организира црквата „Пресвета Богородица“ со благослов и поддршка на Македонската Православна Црква – Охридска Архиепископија.

Нека е за многу години!