Насмевката – лек за сите болести

Луѓето кои почесто се смеат се поздрави. Овој факт е поткрепен со безброј научни истражувања кои се правени многу години.

Поради големото позитивно дејство кое насмевката го има врз здравјето на луѓето, во шеесеттите години од минатиот век е создадена геотологијата – наука која го проучува влијанието на насмевката. Оваа наука од година во година сѐ повеќе и повеќе се надградува, бидејќи сѐ поголем е бројот на евидентирани случаи во кои причина за излекување од одредена болест е токму смеењето.

Покрај тоа што ќе ви се подобри расположението додека се смеете, имајте предвид дека смеењето истовремено и ве лекува.

Во продолжение на статијата информирајте се зошто е здраво сѐ почесто да се смеете, односно на што точно влијае насмевката во вашиот организам.

• За време на смеењето од телото се ослободуваат сите акумулирани и наталожени стравови, се ослободува бесот, гневот, агресивноста и тремата.
• Пред некоја важен настан ако има соодветна смешна ситуација која ќе ве натера да се изнасмеете од срце, не штедете ја насмевката во никој случај, затоа што после тоа концентрацијата ќе ви биде на високо ниво, објективно ќе ја согледувате ситуацијата, ќе бидете повнимателни кон себе и кон другите, покреативни, полни со самодоверба и со невидена леснотија ќе ги извршите предвидените активности, затоа што ќе бидете ослободени од сѐ што е негативно во вас благодарение токму на смеењето.
• Смеењето го зајакнува имуниот систем при што ги уништува ќелиите кои се заболени од бактерии и вируси.
• Смеењето ја подобрува работата на срцето и крвотокот, ја зголемува фреквенцијата на срцето кое може да достигне и до 120 отчукувања во минута. Како резултат на добрата циркулација се активира одбранбениот систем на телото, се подобрува размената на материите, се намалува покачениот притисок и се намалува нивото на шеќер во крвта.
• Смеењето го зголемува капацитетот на белите дробови со што ги снабдува со големо количество на кислород.
• За време на смеењето се лачи хормонот на среќата кој според истражувачите претставува природен аналгетик.
• Смеењето ја намалува и во некои случаи сосема ја отстранува болката кај луѓето заболени од артритис, ги ослободува грчевите од мускулите, ги намалува спондилотичните болки, главоболките и мигрената.
• Покрај што смеењето дава сила, охрабрува и релаксира, тоа исто така и го забрзува процесот на оздравување.
• За време на силно и долготрајно смеење во телото се активираат повеќе од 300 различни мускули, со чија стимулација се подобрува нивната функција, а како резултат на тоа се подобрува и општото човеково здравје. Додека вие се смеете мускулите на дијафрагмата, лицето, стомакот, грбот, нозете и рацете се ставени во ваша функција.

Само луѓето имаат способност да се смеат и не залудно им е токму нив дадена таа способност. Искористете ја оваа способност максимално и смеете се колку што можете повеќе, на тој начин ќе бидете поздрави, посреќни и полни со самодоверба.