Продолжен рокот за бесплатни микрочипови за миленичињата – казните од 100 до 1.000 евра

Агенцијата за храна и ветеринарство го продолжи рокот за реализација на акцијата за бесплатно микрочипирање на домашните миленици. Наместо на 31 март како што беше најавено, оваа активност ќе заврши на 31 декември годинава. За таа цел набавени се бесплатни 100 илјади микрочипови. Директорот на Агенцијата за храна и ветеринарство Зоран Атанансов, на прес конференција истакна дека акцијата продолжува, бидејќи во системот на Агенцијата досега се евидентирани 49 илјади домашни миленици.

„Од 1 април, од кога почнува да тече новиот рок за реализација на оваа акција, аплицирањето на микрочипот ќе се наплатува по 200 денари од страна на ветеринарните друштва,  за издавање на пасошот за миленикот ќе се плаќа по 120 денари, додека самиот микрочип, кој го обезбеди Агенцијата ќе биде бесплатен. Од 1 април, инспекциксите служби ќе изрекуваат и соодветни мерки доколку затекнат неидентификуван миленик. Казните за физичките лица се движат од 100 до 150 евра, а за правните лица илјада евра во денарска противвредност“, рече Атанасов.

Кампањата за бесплатно микрочипирање на милениците, е дел од тригодишната стратегија што ја донесе Агенцијата за храна и ветеринарство во која една од точките се однесува и на одговорното сопствеништво и справувањето со проблемот со бездомните  кучиња.