Колку се безбедни работниците во Гостивар? За три месеци се случиле 14 несреќи при работа

Изминатиот период на подрачјето на Гостивар беа евидентирани повеќе несреќи при работа во кои имаше повредени лица. Во последниот случај малолетник е тешко повреден, додека работел на објект во изградба. Се актуелизираат низа прашања: Колку работниците се безбедни додека ги извршуваат своите работни задачи? Дали инвеститорите легално ги ангажираат и им обезбедуваат соодветни услови за работа? Зошто има голем број на ваков тип несреќи?

Минатата година, на поширокото гостиварско подрачје во Секторот за внатрешни работи Тетово пријавени се вкупно 40 несреќи при работа. Една од нив завршила со смртни последици, со едно загинато лице, додека во вакви несреќи 18 лица лани се здобиле со тешки телесни повреди.

Во првите три месеци од оваа година, вкупниот број несреќи при работа на ова подрачје изнесува 14, во кои четири лица завршиле со тешки телесни повреди.

„Најголемиот број од минатогодишните и годинашните несреќи се случиле при изведување на разно-разни градежни активности, најчесто како резултат на човечко невнимание или некористење на соодветна заштитна опрема, односно непридржување кон пропишаните критериуми и стандарди за заштита при работа.“, наведува полицијата.