„Само небото е граница“ порачаа учениците од Гостивар преку претстава и слики

Ученици од основните училишта „Гоце Делчев“ и „Мустафа Кемал Ататурк“ од различни националости, беа дел од проектот „Само небото е граница“, во чии рамки се одржа мултиетничка претстава и ликовна колонија. Преку глума и сликање низ заедничка дружба, дечињата испратија порака за соживот, меѓусебно разбирање и заедништво.

„Основна цел на проектот е подигнување на свеста за значењето на културните настани, кои претставуваат значаен сегмент од секојдневниот живот.  Вклучени се ученици на возраст од 9 до 14 години од различни етнички заедници, Македонци, Албанци, Турци, Роми, а меѓу учесниците има и деца со попреченост. Она што сакаме да го докажеме е дека ниту јазикот, националноста, возраста или полот не се пречка за спроведување на вакви активности, туку напротив влијаат кон подобрување на заедничкиот соживот во градот“, рече Анета Филипоска, координатор и спроведувач на проектот.

Учениците работеа под менторство на наставничките Александра Наумческа, Севим Суло и Елизабета Наумческа.

Настанот има и хуманитарен карактер и собраните средства од продажба на сликите создадени од учениците, ќе бидат донирани за помош на деца со посебни потреби.

Проектот „Само небото е граница“ се реализира со поддршка на Министерството за култура.