Маврово и Ростуше подновено со ровокопач, преса, контејнери за пластични шишиња…

На подрачјето на Општина Маврово и Ростуше, периодов има повеќе новини во насока на подобрување на општинските услуги и заштита на животната средина. Општината доби универзален ровокопач со додаток даска за чистење снег и пневматски чекан, кој ќе се користи за повеќе намени: за копање за водоводни линии, чистење на одрони, кршење на карпест предел и на асфалт при дефекти, на зима за чистење снег и друго. Возилото е обезбедено преку Проектот за подобрување на општинските услуги, а ќе го користат општините Дебар и Центар Жупа.

Освен тоа, Јавното претпријатие „Маврово“ преку донација од Глобален еколошки фонд обезбеди преса и 50 контејнери за пластика.

„Ова е од големо значење за еколошки почиста средина, со оглед на тоа што значително ќе се намали количината на смет којшто се одлага на депонија. Контејнерите за пластика, кои се исклучиво за пластични шишиња, ќе бидат распоредени и во мавровскиот и во долнореканскиот регион. Имаме плус пет контејнери од „Пакомак“ за стакло, распоредени во населените места околу езерото. Сакаме да апелираме до граѓаните и посетителите, контејнерите да не се уништуваат и да не се фрла друг отпад во нив, односно да се користат според намената“, вели директорката на ЈКПД „Маврово“, Александра Матеска.

Претпријатието периодов спроведува акции за отстранување на градежниот шут покрај контејнерите за комунален смет и на други недозволени локации и упатува апел оние кои таков отпад да им се обратат, за да им биде посочено на која локација може да го одложат.