Во понеделник во Гостивар отворен ден од воената вежба „Одлучен удар“

На градскиот плоштад во Гостивар, во понеделник (1 јули) во периодот од 18 до 21 часот, ќе се организира отворен ден од воената вежба „Одлучен удар“. Како што е најавено, граѓаните ќе имаат можност преку директна комуникација со припадниците на армијата на САД и македонската армија поблиску да се запознаат со опремата, процедурите што ги извршуваат учесниците на вежбата, како и со воените возила кои се користат.

Вежбата „Одлучен удар“ е национална теренска вежба со повеќе меѓународни учесници, која се реализира од 5 јуни до 9 јули на „Криволак“, со учество на околу 2.700 војници. Организирана и предводена е од тим за планирање од нашата армија, поддржана со планери од вооружените сили на Соединетите Американски Држави и четири НАТО држави од Европа (Бугарија, Црна Гора, Албанија и Литванија).

Цел на вежбата е да обезбеди синхронизација на расположливите сили и капацитети и потврда на тактиките, техниките и процедурите за координирани конвенционални операции и здружени и комбинирани операции во урбана средина, во различни временски услови и да го зголеми нивото на интероперативност и интеграција како помеѓу конвенционалните, така и помеѓу силите за специјални операции на партнерските земји.