Стартува кампања за заштита од пожари – „Иднината им припаѓа на оние кои се подготвени“

Дирекцијата за заштита и спасување од денес (15 јули) почнува со едномесечна кампања за заштита од пожари. Кампањата ќе се одвива преку едуцирање на населението за намалување на заканите од пожари, со помош на едукативен прирачник и постери со чекори за заштита во случај на шумски пожари кои ќе бидат поставени низ градовите, на наплатни станици, излетничките места и други локации.

„Целта на оваа кампања не е само да се делува превентивно, туку и едукативно, преку подигнување на свеста на населението за сите можни ризици што пожарите ги носат како катастрофа, бидејќи влегуваме во таканаречен критичен период во годината за појава на пожари на отворен простор“, изјави директорот на ДЗС, Аднан Џафероски.
Кампањата ќе се води под мотото „Иднината им припаѓа на оние кои се подготвени“. Вакви активности се предвидени и за намалување на последиците од поплави, земјотреси и други катастрофи предизвикани од природата и човекот.

Во однос на превенцијата од шумски пожари, од март активна е забрана за движење во шума и шумско земјиште освен за вработените во ЈП Национални шуми, која ќе трае до нејзино отповикување.