Патот од гостиварска патарина до Здуњска раскрсница ќе се рехабилитира

До крајот на следната недела треба да започнат работите за реконструкција на патот  од наплатната рампа – Гостивар до Здуњската раскрсница, делница во должина од околу три километри.

Директорот на Јавното претпријатие за државни патишта, Зоран Китанов при увидот на работите на патот Маврово-Ниќифорово во четвртокот (12 септември), информираше  дека тендерските процедури за овој проект се завршени.

„Го чекавме сообраќајното решение и чекавме малку да се намали интензитетот на сообраќајот со иселениците. Сега веќе ќе започне рехабилитацијата на патот од наплатната рампа кај Гостивар до раскрсницата кај Здуње. Не ми беше јасно зошто овој дел е прескокнат, кога се рехабилитираше патот од Здуње до Кичево, но го увидовме тоа, го ставивме во Програмата, тендерот е завршен, изведувачот е избран и за седум дена ќе започне со работа“, изјави Китанов.