Расте бројот на мртви во Албанија, од урнатините извадени тела на мајка и син

Бројот на жртви во разорниот земјотрес од 6,3 степени што ја стресе Албанија, се искачува над 30. Албанските медиуми јавуваат дека во последниот случај, биле пронајдени две тела. Повикувајќи се на информации од тамошното Министерствот за одбрана пишуваат дека се работи за мајка и син, чии безживотни тела биле извадени од урнатините на шесткатница што се срушила во земјотресот.

Во Албанија владее вонредна состојба, страотни глетки, урнатини, исплашени граѓани, а спасувачките екипи прават обиди да спасат животи. Повеќе од 20 лица се водат како исчезнати, а бројот на повредени е над 650, од кои десетина се во критична состојба.

Тлото во земјата не престанува да се тресе. Денес во 15.45 часот нов силен земјотрес од 5,3 степени ги погоди регионите на Драч и Туман.