Се формира ЈП за отпад „Русино/Полог“, основањето чини 1,2 милиони денари

Започнаа процедурите за основање на јавно претпријатие за регионално управување со отпадот во Полошкиот плански регион, кое ќе биде заедничко за општините Тетово, Гостивар, Врапчиште, Брвеница, Боговиње, Теарце, Желино, Јегуновце и Маврово и Ростуше.

Претпријатието ќе се вика „Русино/Полог“, а ќе има надлежности за управување со отпадот на депонијата Русино, понатамошен развој на Русино во депонија за безопасен комунален отпад, организирање и управување со новите капацитети за ослободување од отпад откако капацитетот на Русино ќе се исцрпи, управување со други установи за отпад кои ќе имаат корист од управувањето со цврст отпад во Полошкиот регион, како и други општи активности за управување со отпад. Според податоците наведени во одлуката којашто треба да ја усвојат општинските совети, за основање на претпријатието ќе бидат потребни околу 1,2 милиони денари.  Трошокот ќе го сносат општините, во пропорционален износ со бројот на население. Најмногу пари треба да дадат Тетово (350 илјади денари) и Гостивар (319 илјади денари), а најмал износ Јегуновце (39 илјади денари) и М.Ростуше (34 илјади денари)

Заедничкото регионално јавно претпријатие ќе има две претоварни станици кои ќе се организираат како подружници и тоа: Претоварна станица во Тетово – каде ќе се транспортира отпадот од општините Желино, Теарце, Јегуновце, Тетово и Претоварна станица во Маврово и Ростуше – каде ќе се транспортира отпадот од општината Маврово и Ростуше.