Вкусен залак за љубителите на месено – млечни кифлички

Ако ги сакате месените работи, тогаш овој рецепт за млечни кифлички мора да го испробате. Меки се и вкусни, па веруваме дека лесно ќе ви станат омилени.

Состојки:

1 литар млеко
1 коцка свеж квасец
1 кг. брашно
100 гр. шеќер
1 маргарин (кристал)
сусам
1 јајце
4 лажички сол
300 мл. масло

Подготовка: Најпрво квасецот се раствора во млакото млеко и се додаваат шеќерот и малку брашно. Се меша добро, па се додава и маслото за јадење и се остава да отстои околу 20 минути да стаса. Откако ќе отстои смесата се истура во брашното измешано со солта во подлабок сад и се меси тестото. Добро измесеното тесто треба да отстои 20 минути. По 20 минути размесете го и почнете да ги правите кифличките. Се земаат три дела  и се формираат топчиња, па се расукуваат. Врз двете се нанесува маргарин и ставаат една врз друга, а третата се става одозгора (без маргарин). Потоа со сукалка се развлекува кората и се дели на осум дела, па се формираат кифличките. Постапката се повторува со целото тесто. Кифличките се редат во намрсен плех, одозгора со четка се мачкаат со разматено јајце, се става и сусам и по малку маргарин. Се оставаат малку да отстојат, а потоа се печат во рерна околу 15 минути на 200 степени.