Општина Гостивар: За неполни два месеци третирани се 120 кучиња скитници

Локалната самоуправа на Гостивар соопшти дека од почетокот на годинава постигнува рекордни резултати во третманот на кучињата скитници. За помалку од два месеци, биле третирани 120 кучиња скитници, што значи заловување, вакцинирање, стерилизација и чипирање.

„Кучињата кои се третирани веќе не претставуваат опасност за граѓаните, бидејќи не се агресивни. Дел од третираните кучиња се згрижуваат во двата постоечки стационари, а планирано е некогашната касарна во Долна Бањица да се прилагоди како Центар за засолниште, со што ќе се зголеми капацитетот за згрижување на кучињата скитници.“, се наведува во соопштението.

Од општината потсетуваат дека граѓаните може да ги вдомуваат кучињата коишто се третирани во стационарите. „Со овој гест граѓаните можат да стекнат лојален придружник, но и да придонесат за решавање на проблемот со кучињата скитници. Општина Гостивар е една од ретките во земјава која бележи напредок во борбата за решавање на овој проблем, но сепак ова е проблем што не може да се реши само на општинско ниво и бара заедничка стратегија на ниво на целиот Полошкиот регион, но исто така и на ниво на државата.“, потенцираат од локалната самоуправа.