Презентиран проект за граѓанско учество

Во Гостивар се одржа презентација на Проектот за граѓанско учество, финансиран од Американската агенција за меѓународен развој, УСАИД. Активностите, целите и можностите за користење на грантови преку проектот беа претставени пред претставници на невладините организации, институции и приватниот сектор од гостиварскиот регион. Проектот се спроведува во партнерство со Асоцијацијата за демократски иницијативи (АДИ) од Гостивар.

Целта е младите и граѓанските организации да се здобијат со знаење, мотивација, вредности и да развијат вештини кои ќе им овозможат активно да се вклучат во дијалогот со власта и приватниот сектор во акции кои ја промовираат добросостојбата во нивните заедници.

„Граѓанската партиципација во политичкото одлучување и во јавниот живот е нешто од кое сите имаме корист. Се надевам дека организациите од Гостивар ќе покажат интерес за користење на нашите грантови. Ние со задоволство ќе соработуваме и се надевам дека ќе помогнеме да се поддржат значајни локални  иницијативи“, изјави  директорот на канцеларијата за развој на УСАИД, Едуард Гонзалес.

Проектот започна лани во ноември и ќе трае пет години.