Повторно студ – внимавајте на поледиците!

По неколкудневното релативно нормализирање на температурите, се враќа поларниот студ. Во регионот на Гостивар, температурите утрово паднаа 8 степени под нулата, а во текот на наредните денови се најавува уште поголемо опаѓање.

Здравствените служби апелираат граѓаните да бидат крајно внимателни додека се движат по тротоарите, заради појава на поледица. Исклучителна претпазливост препорачуваат и од Автомото Сојузот на Македонија: возачите да внимаваат, да ја прилагодат брзината на движење и да ја почитуваат сообраќајната сигнализација. Забрани за сообраќај, сега засега, не се воведени.

Од гостиварското одделение на Цетарот за јавно здравје излегоа со препораки до граѓаните и работниците кои работат на отворено во услови на студено време.

Во периодот на ниски температури  да се избегнува престој на отворено. Доколку се јави неопходна потреба за престој на отворено, да се ограничи максимум на 2 часа. Да се носи топла облека, обувки кои спречуваат лизгање, да се конзумираат топли напитоци. Хронично болните лица да одбегнуваат непотребни излегувања на отворено, да ја обезбедат навремено редовната терапија и редовно да ја земаат. Да се избегнува непотребно патување, доколку има неопходна потреба од патување да се понесе топла облека, ќебе, храна, вода, поради ризик од непроодни или отсечени делници.