Реконструкција на хирургија во Гостивар: Соби со клима и ТВ, специјален под, нови врати и прозорци…

Пациентите кои во иднина ќе се оперираат и третираат на хируршкото одделение во гостиварската болница, ќе имаат современи услови според високи стандарди. Во овој оддел, се изведуваат работи за реконструкција, кои целосно ќе го променат изгледот на хирургија.

Проектот опфаќа поставување на специјални подови, зафати во електричната инсталација, нови врати и прозорци, посебен оддел за интензивна нега на оперираните пациенти и друго. Сите болнички соби ќе бидат климатизирани со телевизори, а се подготвуваат и еднокреветни апартмани.

„Поголемите градежни работи се веќе завршени. Деновиве ќе се работи на подот, кој ќе биде специјален, антимикробен. Потоа ќе следува поставувањето на вратите, прозорите и сите други финеси што треба да се довршат. Може да кажеме дека одделението ќе има многу добри услови за пациентите, кои ќе ги исполнуваат веропските стандарди. Конечно Гостивар тоа го заслужува, а и тимовите на хирургија кои имаат вложено и дадено многу во здравството, заслужуваат да работат во еден таков модерен простор“, изјави Јакуп Јакупи, директор на општа болница „Д-р Ферид Мурад“ во Гостивар.

Според најавите, проектот комплетно би требало да се заокружи за 40-тина дена.

Директорот Јакупи вели дека хируршкото одделение во Гостивар располага со модерна апаратура и опрема и има доволно професионален кадар од општи и хирурзи специјалисти за да ги задоволи потребите на пациентите за реонот што го покрива.

Проектот за реновирање на хирургија болницата го реализира од сопствен буџет, а вредноста достигнува околу 12 милиони денари.