Кучиња скитници уништиле возила во Гостивар, граѓаните стравуваат од напади

Непријатни глетки со искршени автомобили од бездомни кучиња, внесуваат страв и загриженост кај гостиварци. Граѓани реагираат дека за само неколку дена, кучињата оштетиле три возила кои биле паркирани зад стариот трговски центар Јавор на „Илинденска“. Велат дека ги пријавиле случаите во полиција и стравуваат за својата безбедност.

„ Кучињата се очигледно преопасни. Штетите се и над илјада евра, но материјалната штета и не е толку важна, колку податокот дека кучињава искасапиле лим од возила. Не знаеме, се прашуваме, можеби се со беснило. Истите кучиња постојано се во овој реон. Навечер не може да се излезе слободно, се плашиме да не не’ нападнат. Мора да се преземат некои мерки пред да се случи нешто страшно по нашите животи“, кажуваат граѓаните.

На зголемен број на бездомни кучиња изминатиот период алармираа и граѓани во делот кај автобуската станица и Пожарна, како и околу градскиот пазар.