Казни од илјадници евра-Апел граѓаните и дуќанџиите да го чистат снегот пред зградите и локалите

Секторот за внатрешни работи Тетово ги потсетува граѓаните на нивните законски обврски за навремено отстранување, односно чистење на снегот од пред дуќаните и фирмите во кои работат и зградите во кои живеат.

Согласно Законот за јавна чистота и Законот за бeзбедност на патниот сообраќај, правните лица, сопственици на објекти, кои нема да обезбедат редовно и квалитетно чистење на снегот од јавните простори пред објектите, ќе се соочат со соодветни поднесоци и со законски предвидените парични глоби кои се движат од 500 до 1000 евра и плус 100 за одговорното лице на објектот или од 2000 до 3000 евра во денарска противвредност за правните лица.

Полициските службеници на Секторот за внатрешни работи Тетово ги интензивираа контролните активности на овој план, на патиштата, улиците и тротоарите и ги преземаат законски предвидените мерки, секаде каде ќе утврдат конкретни недостатоци.

До граѓаните се апелира, исто така, снегот што ќе го чистат да не го фрлаат на коловоз, а возачите задолжително да поседуваат зимска опрема, да ја прилагодат брзината според условите на патот и да не тргнуваат на пат со технички неисправни возила, изморени или под дејство на алкохол.Ова, пред се однесува на оние возачи кои планираат да патуваат кон Стража, Маврово или Попова Шапка.