Филипче: Корона состојбата во Гостивар стабилна, но граѓаните да не се опуштаат

Регионот на Гостивар држи стабилно ниво со коронавирусот од почетокот на годинава. Бројките на новозаразени се ниски, а намалена е и потребата од хоспитализации.

При денешната посета на Гостивар, по повод отворањето на модуларната болница, министерот за здравство Венко Филипче потврди дека подрачјето е стабилно што се однесува до ширењето на коронавирусот, но порача граѓаните да ги почитуваат мерките, за да не дојде до нов бран.

„Во овој момент, ситуацијата во Гостивар е навистина стабилна, под 10-тина хоспитализирани пациенти. Но, тоа не значи дека граѓаните треба да се опуштат и да не се носат маските или да не се држи дистанца. Се надевам дека граѓаните ќе се придржуваат до мерките, посебно сега кога има зголемен број на пациенти во други градови со британскиот сој“, рече Филипче.

Подрачјето на Гостивар актуелно е со 138 активно заразени со коронавирус, а на инфективното одделение се хоспитализирани 4 пациенти.