МЗ: Притисокот врз болниците е голем, граѓаните да ги почитуваат мерките

Министерството за здравство соопшти дека притисок врз болниците во државата е голем и тие брзо се исполнуваат со КОВИД пациенти, но и покрај тоа обезбедени се слободни места на повеќе Клиники, Институтот за белодробни заболувања Козле како и на интерните клиники.

„Сите болници и медицински кадар се целосно мобилизирани. И во болниците низ државата, секојдневно системот се менаџира, помеѓу постојаните инфективни одделенија во здравствените установи и модуларните болници. Оваа здравствена криза погодена од третиот може најсилен бран досега е присутна насекаде – кај нас, во регионот, во цела Европа. Состојбата е критична, но граѓаните не треба да се грижат, оние кои имаат потреба во секое време добиваат соодветна здравствена грижа и третман во болниците. Министерството за здравство упатува апел до сите граѓани да ги почитуваат мерките за заштита од вирусот КОВИД-19.“, соопштија од МЗ.

Министерството за здравство ги повика граѓаните секој индивидуално да даде свој придонес во борбата со корона вирусот и да им помогне на здравствените работници, во оваа исцрпувачка битка која трае повеќе од една година.