„Виртуелни модринки“ – Стоп за скандали како Јавна соба и родово базирано насилство

Гласно да се зборува за родовото базирано насилство, а злоупотребите на фотографии и демнењето да се казнуваат. Ова се пораките што се испраќаат преку проектот „Виртуелни модринки“ што го спроведува организацијата ИГИ-Гостивар, а беше презентиран денес на прес конференција.

Во склоп на проектот експертски тим направил анализа на скандалозниот случај Јавна соба, кој силно ја вознемири јавноста. „Експертите констатираа дека постои брутално изживување врз млади девојки и жени, злоупотреба на нивни приватни фотографии или фотографии преземени од социјалните мрежи, при што начинот на којшто се третира, односно нетретира ова кривично однесување, остана простор за појава на нови вакви или слични групи. Исто така, експертите утврдија дека нашето законодавство не нуди правна заштита на жртвите, а неказнивоста ги охрабрува луѓето да членуваат во вакви групи.“, истакна Маја Христовска, координатор на проектот.

Во рамки „Виртуелни модринки“, се спроведува кампања која има за цел да придонесе во помасовно вклучување на јавноста во процесот на справување со родово базирано насилство.

„Родовото базираното насилство за жал се уште претставува еден од најгорливите проблеми во нашето општество. Веруваме дека со искрени напори и заеднички заложби ќе придонесеме во нарушување на молкот по основ на ова прашање како и за побезбеден живот на секоја жена.“, рече Анета Филипоска, извршен директор на ИГИ.

Проектот е финансиски поддршан од калифорнискиот Фонд за ургентни акции за правата на жените. Следна активност ќе биде креирање на мобилна апликација преку која ќе може да се пријавува секаков вид на семејно насилство со еден клик.