Притвор за трите лица осомничени за нападот врз обвинител од ОЈО Гостивар

Судија на претходна постапка од Основиот суд Тетово определи мерка притвор од 30 дена на трите лица осомничени за нападот во Чегране врз јавниот обвинител од Основното јавно обвинителство во Гостивар. Според информациите од полицијата, тие вечерва ќе бидат спроведени во КПУ Затвор Скопје, за издржување на притворот.

Настанот се случил утрово во 5.30 часот. МВР соопшти дека набрзо потоа подоцна полициски службеници лишиле од слобода 40 годишник, неговиот малолетен син, двајцата од Чегране, и 41 годишник од Церово, тетовско, поради постоење основи на сомнение дека по претходна расправија околу недоразбирања во сообраќајот, физички го нападнале и со остар предмет го повредиле 39 годишниот обвинител Х.И. од Форино.

Јавното обвинителство излезе со соопштение дека бил извршен обид за убиство на јавниот обвинител и дека тој бил нападнат со нож при што му е зададена убодна рана во грбот, но е надвор од животна опасност и е на лекување на скопските клиники.