Учениците од Гостивар воодушевија со креативност, вештини и знаење по повод 21 Март

Интересен настан што ги спои Денот на екологијата и Денот на лицата со Даунов синдорм се одржа денес во Гостивар. Учениците од основните и од средните училишта ги презентираа своите модни креации од рециклирани материјали, и проекти и изработки со еколошки мотиви. Дел од одбележувањето на 21 Март беа и децата со Даунов синдром и со попреченост.

Настанот го организираше Општина Гостивар во партнерство со училиштата, а се вклучија и невладините „Заедно можеме“ и „Дава“.

„Децата ги претставуваат своите модели изработени од рециклирани материјали и проекти што ги направиле во насока на подигнување на еколошката свест. За оние што ќе бидат избрани за најдобри предвидени се награди“, рече Аслијан Снопче од Секторот за образование.

Креативноста, умешноста и знаењето, учениците го прикажаа преку впечатливи фустани и други костими направени од вреќи за отпад, медицински маски, хартија итн, како и преку најразличните изработки кои ги презентираа на штандовите.

Дека гостиварските ученици имаат имагинација и се креативни се сложи и градоначалникот Арбен Таравари.

„Одбележуваме значаен датум, 21 Март, како Ден на екологијата и како Ден на лицата со Даунов синдром, а оваа активност ги спојува. Се надевам дека ќе имаме што повеќе вакви интересни настани. Се гледа дека децата имаат убави идеи и знаат како да ги реализираат. Децата се секогаш покреативни од возрасните“, рече градоначалникот.

Општината на Сезер Имери, кој има Даунов синдром му додели благодарница за придонес во работата на хуманитарната организација Дава.

Настанот се одржа во спортската сала на гимназијата.