За влез во ЕУ од 2023 година, задолжително ETIAS барање и 7 евра влезница

Од мај следната година во употреба ќе биде пуштен Европскиот систем за патни информации и овластувања (ETIAS), што ќе значи нови правила за влез во земјите-членки.

Сите патници кои ќе сакаат да патуваат во земјите на ЕУ ќе треба да пополнат формулар онлајн и да платат еднократна такса од 7 евра за секоја апликација, која ќе важи за сите постари од 18 и помлади од 70 години. 

„Потребно е поднесување на барање за сите патувања пократки од 90 дена, кои вклучуваат туристички, деловни, медицински патувања, како и транзит низ земјите на ЕУ. Системот ETIAS се применува за патување со сите транспортни средства, копно, воздух или море“, соопшти ЕУ.

Со оваа процедура ќе бидат опфатени околу 60 држави низ светот, меѓу кои е и Северна Македонија.

Дозвола за патување, без која нема да може да се влезе во земјите на ЕУ, во најголем број случаи ќе се издава во рок од неколку минути од поднесувањето на барањето, а поради дополнителна проверка на дозволите, може да се чека и до 30 дена. Апликантот може да поднесе жалба доколку неговото барање е одбиено.

Ова се европските земји за кои ќе биде потребен валиден ETIAS за влез од мај 2023 година:
Австрија, Белгија, Бугарија, Хрватска, Кипар, Чешка, Данска, Естонија, Финска, Франција, Германија, Грција, Унгарија, Исланд, Италија, Латвија, Лихтенштајн, Литванија, Луксембург, Малта, Холандија, Норвешка, Полска, Португалија, Романија, Словачка, Словенија, Шпанија , Шведска и Швајцарија.