Алармантно: Конзумираме два пати повеќе сол од препорачаното

Во Македонија просечно се консумираат 11,5 g сол на ден, што е над два пати повеќе од препораките на Светската здравствена организација, објави Институтот за јавно здравје. Македонија годинава се приклучи на Глобалната недела на подигнување на свеста за намалување на сол во исхраната, во чиј фокус беше количината на сол во лебот кој секојдневно го јадеме.

Количината на сол во лебовите што се продаваат во Република Македонија варира од 0,36 до 2,5 грама на 100 грама леб, што е далеку над препораките во Обединетото Кралство, кои беа земени како референтни, објави Институтот.

„Солта е важен дел на исхраната на нашата популација, а од јавно-здравствен аспект најважна е нејзината улога како „носач“ на јодот кој е неопходен во спречувањето на определени болести. Сепак, населението во Македонија внесува најмалку два пати повеќе сол во споредба препораките на СЗО. Внесот на сол преку белиот леб е карактеристичен поради тоа што тој леб преовладува во исхраната на нашето население и се покажа дека количините на сол во тој леб се меѓу повисоките, дури и во светски рамки. Државата, во соработка со СЗО и со индустриијата за храна, мора да започне активности во насока на достигање на целите на СЗО за намалување од 30% на внесот на сол до 2025 година“, стои во изјавата на д-р Игор Спироски од Институтот за јавно здравје и доцент на Медицинскиот факултет во Скопје.

Институтот за јавно здравје повика на донесување и усвојување на цели за највисока дозволена количина на сол во леботво нашата земја, како и континуирана контрола за почитување на истите.