Ангелов: Ќе обезбедиме нова градинка, нов мост, решавање на сообраќајниот хаос, намалување на разликите град-село

„Предизвикот на секој општествено свесен граѓанин е да придонесе за општото добро на заедницата во која живее. Нашата цел е Гостивар да го направиме подобро, поквалитетно и перспективно место за живеење на сите граѓани. Место каде што секој ќе ја гледа својата иднина и иднината на своите најблиски“, рече на денешната прес конференција, носителот на советничката листа за Гостивар од редовите на СДСМ, Зоран Ангелов презентирајќи дел од нивните изборни проекти.

„Коалицијата предводена од СДСМ ќе обезбеди изградба на нова градинка во населба Циглана и подобрување на условите во постоечките. Ќе ја приспособиме постоечката урбана инфраструктура да биде во функција на потребите на граѓаните. Сообраќајниот хаос ќе го решиме преку изградба на катна гаража во склоп на новиот градски пазар и преку отворање на Булевар,, Браќа Ѓиноски “ од раскрсница на ул. ЈНА до Основен Суд Гостивар. Во нашата програма е предвидена и изграддба на нов мост на реката Вардар кој ќе го спои бул. Браќа Ѓиноски со населбите Дутлок, Горна и Долна Бањица, паралелен на постоечкиот кој не ги исполнува потребните услови за фрекфенција на патнички и товарни возила. Ние ќе ги намалиме разликите помеѓу градот и околните селски средини. Имаме предвидено и проширување на регионалниот пат од с.Тумчевиште до автопатот Тетово –Гостивар, проширување на локалниот пат од село Долна Бањица до Населба Цигланаи изградба на нов пат од населба Фазанерија до манастирот Преображение. Ќе обезбедиме и доизградба на канализациона мрежа во околните села, зошто навистина е срамно и жално во 21 век, жителите на општина Гостивар да живеат со такви проблеми“, информираше Ангелов.

Носителот на листата заедно со кандидатите за членови на Советот денешниот прес го искористија и да упатат покана до граѓаните за централниот митинг на СДСМ во Гостивар за Локалните избори, кој ќе се одржи во четврток (28.9) на градскиот плоштад со почеток во 20 часот.