Конвенција во Гостивар на кандидатот за градоначалник од Алијанса за Албанците, Арбен Таравари

Алијанса за Албанците вечерва во Гостивар одржа промотивна Конвенција на која го претстави својот кандидат за градоначалник, Арбен Таравари и советничката листа со која настапува на октомвриските Локални избори.

„Пред гласачите на овие локални избори излегуваме со амбициозна програма по Европски терк, подготвена од експерти која ја нарековме „Гостивар на прво место“. Во неа има девет приоритети на кои ќе се посветиме за да го вратиме сјајот на Гостивар. Ќе бидеме транспарентна општина, отворена за сите:граѓаните, бизнисмените, невладините организации, медиумите. Ќе кажеме стоп за корупцијата и криминалот. Ќе работиме на локален економски развој креирајќи партнерства со приватниот бизнис сектор. Ќе обезбедиме чиста вода за пиење и инфраструктура за сите граѓани. Ќе ги развиваме спортот и културата со промоција на уметници и отворање центри за млади. Во делот на образовните институции предвидуваме отворање на нутриционистички мензи во училиштата. Јавниот превоз ќе биде организиран со еко автобуси и ќе биде бесплатен за пензионери и социјално ранливите семејства. Наш голем проект е целосна реконструкција и доградба на болницата со што ќе ја имаме најдобрата болница во земјата и регионот“, рече Таравари во својот говор пред присутните.

На Конвенцијата свое обраќање имаше и носителот на листата на советници од Алијанса за Албанците, Бесим Мемеди. „Да се биде носител на советничката листа која застанува зад ваков кандидат за градоначалник за мене е голема чест. Тоа не е привилегија, туку една голема обврска. Сите кандидати за членови на советот од нашата листа се луѓе професионалци, кои имаат дадено продонес во своите области. Сигурен сум дека со таков тим ќе победиме на изборите“, нагласи носителот на листата од Алијанса за Албанците.

Во своето обраќање, претседателот на партијата, Зијадин Села ја оцени атмосферата во Гостивар како славеничка и ги повика гласачите да го дадат својот глас за нивниот кандидат и листа.  „На политичката сцена низ годините се менуваа многу политички партии, но се остануваше исто. Алијанса за Албанците не зборува за работа, туку работи и тоа граѓаните го гледаат“, рече Села.