Барселона во посета на Македонија – се разгледува можноста за отварање фудбалска школа

Шпанскиот фудбалски гигант Барселона ја разгледува можноста за отварање фудбалска школа во Македонија. Директорот за развој на меѓународните проекти на школата од Барселона, Инаки Гонзало изминативе денови беше во посета на Тетово и Охрид разгледувајќи го моменталните капацитети, инфраструктурата и можноста за дополнителна инвестиција како би се создале комплетни услови еден од најдобрите европски фудбалски клубови да отвори школа кај нас.

Гонзало имаше средба и со градоначалникот на Охрид, Никола Бакрачески на која ја потенцираше желбата Барселона да има една своја фудбалска база за најмлади категории токму покрај охридското крајбрежје, комплетирана и со Академија на каталонскиот тим и организација на летни и зимски кампови.

Како што е познато, Барселона преку својата дирекција за развој на меѓународни проекти повеќе од десет години отвара свои академии ширум светот, од каде потоа се црпи квалитети за настап во младинските категории на шпанскиот гигант.