Бејта во придружба на Филипче во посета на Дутлок: Поддршка од Владата за проектите во Гостивар

„Без поддршка на Владата, само со финансии од општината не може да се реализираат големи проекти. Без Владата и меѓународните фондови не можеме ништо големо да направиме. Јас ја имам поддршката и ќе имам тесна соработка со сите членови на Владата и со премиерот, за да реализираме добри проекти за граѓаните на Гостивар“, истакна на вечерашната средба во гостиварската населба Дутлок, кандидатот за градоначалник од ДУИ, Невзат Бејта, кој на средбата беше заедно со потпретседателот на СДСМ и министер за здравство, Венко Филипче.

Пред граѓаните Бејта зборуваше за проекти и инвестиции кои ги има предвидено во предизборната програма. „Додека, досегашниот градоначалник лажеше 4 години, сам не знае што зборува и не го интересира да реализира проекти за градот и општината, само да прави политичка кариера, јас не доаѓам да правам кариера, туку да работам 4 години на чело на општината, да бидам првиот работник што ќе работи во општината. Ќе го решам проблемот со Русино, ќе ги расчистам кучињата скитници, слободно да можат граѓаните да шетаат, без страв, во сите населби. Ќе ја средиме спортската сала како што треба и нашите спортисти прволигаши, да имаат услови како што прилега. Овде во Дутлок, имаме два стадиони, едниот во минатиот мандат ние го направивме, а тие само добиваа политички поени и го пропаднаа проектот што чини над 400.000 евра. Минатиот мандат во Дутлок изградивме мост, сега предвидуваме и четври мост, што ќе се врзе со раскрсницата со Здуње, да нема проблем со сообраќајот“, рече тој.

Свое обраќање на средбата имаше и Филипче.

„Целта на средбата е да кажеме јасно и гласно дека нашата поддршка, на членовите и симпатизерите, во вториот круг на изборите во Гостивар оди за нашиот пријател, докажан пред се‘ човек, способен менаџер, кој знае да се справи со сите предизици што ги има во рамки на локална самоуправа. Соработката со ДУИ секогаш оди глатко и добро се надополнуваме, а зошто е тоа така, одговорот е едноставен-затоа што делиме еднакви вредности. Сите заедно сакаме државата да оди напред, сакаме да градиме едно општство за сите“, рече потпретседателот на СДСМ.