Цревните инфекции напаѓаат, по 40 пациенти на инфективно во Гостивар за 24 часа

Со затоплувањето на времето, вообичаено за овој период од годината, зачестија стомачните заболувања кај населението. Се зголемува бројот на граѓани кои бараат лекарска помош на инфективното одделение во Гостивар со симптоми на пролив, повраќање, проследени со малаксаност и покачена температура. Во текот на 24 часа околу 40 пациенти се обраќаат во амбулантата на ова одделение и ги има од сите возрасни групи.

„Периодов повеќето пациенти кои доаѓаат за прегледво амбулантата се со гастроинтестинални инфекции, со дијареа, повраќање, грчеви во стомакот, малаксаност, болки по телото и слично. Ако се дехидрирани ги примаме на одделение, ако не се, им даваме симптоматска терапија и ги пуштаме на домашно лекување. Има и пациенти со долнореспираторни инфекции, бронхит и бронхопневмонија. Таквите ги лекуваме тука на одделение и може да кажам дека излегуваат во добра општа состојба.“, информира раководителот на инфективно во Гостивар д-р Ратко Наумоски.

Инфектологот нагласува дека со доаѓањето на печалбарите и сезоната на свадби очекувано се јавуваат и труења со храна, па апелира на внимателност.

„Очекуваме набрзо да дојдат и гастербајтерите, да почнат свадбите, со што вообичаено и да се зголеми бројот на гастроинтестинални заболувања, во кои спаѓаат и труењата со храна. Ние како одделение сме подготвени да реагираме, иако сме со помал број на лекари ќе гледаме да функционираме како што треба, а граѓаните секако треба да бидат внимателни“, вели д-р Наумоски.

Денес на инфективното одделение во Гостивар се третираат 25 пациенти, од кои повеќето по добивање на инфузијата си одат дома, при што потпишуваат документ дека излегуваат од одделението на своја одговорност.