Делото на гостиварката Афродита Џафери е книга на месецот на „Македоника“

Збирката поезија „Океан од соништа“ од гостиварката Афродита Џафери е избрана за книга на месецот од Фондацијата Македоника. Со ова, книгата на младата авторка станува дел од мултикултурната дигитална библиотека на Фондацијата, а ќе биде објавена на албански и на македонски јазик.

Збирката ги опишува мечтите и соништата кои реалноста ги прегазува. Во неа авторката зборува за љубовта кон семејството, пријателите, првите симпатии, луѓето, животните, секогаш барајќи некаков си одговор. Во суштина поезијата е инспирирана од одредени случувања во нејзиниот живот, но сепак понекогаш го бара надреалното и невозможното, мечтаејќи по нови хоризонти.

Афродита е студент на Факултетот за драмска уметност во Тетово. Освен што пишува поезија, се занимава и со фотографија.

Проектот на Македоника „Мултикултурна повеќејазична дигитална библиотека“ е наменет за автори кои пишуваат проза, поезија или драмски текстови и има за цел да ги промовира младите талентирани творци.