Ден на човековите права – Дали и колку се почитуваат?

На денешен датум, во 1948 година, Генералното собрание на ОН во Париз ја усвои Универзалната декларација за човекови права и 10-ти декември стана Меѓународен ден на човековите права.

Оваа декларација ги постави основите за градење на поправеден свет, кој се води од принципот дека сите човечки суштества се раѓаат слободни и еднакви по достоинство и права, без оглед на нивната: раса, боја, пол, јазик, религија, политичко или друго убедување, национално или општествено потекло, сопственост, раѓање, сексуална ориентација и родов идентитет или друг статус.

Во Универзалната декларација се вели дека човековите права треба да бидат заштитени преку владеењето на правото, дека сите луѓе се еднакви пред законот и имаат право, без никаква дискриминација, на еднаква заштита со закон.

Институциите и граѓанските организации по повод 10-ти декември, секоја година испраќаат пораки на подигање на свеста за почитување на човековите права, недискриминација, создавање услови за владеење на правото. Одбележувањето на денешниот ден е добра можност секој од нас да се запраша, дали и колку навистина се почитуваат човековите права и што секој како поединец може да придонесе за подобрување на состојбите.