Денес ново рочиште за автобуската несреќа кај Ласкарци

Во Основниот кривичен суд Скопје денес (19 декември) ќе се одржи ново рочиште од судскиот процес за трагичната несреќа со автобусот на компанијата „Дурмо турс“ кој излета од патот кај селото Ласкарци на 13 февруари.

За автобуската несреќа во која загинаа 16 лица, а 38 беа потешко повредени обвинети се шест лица. Сопственикот на „Дурмо турс“, возачот на автобусот и тројца вработени во станицата за технички преглед. Тие се товарат за тешки дела против безбедноста на луѓето и имотот во сообраќајот, додека едно лице е обвинето за несовесно работење во службата. Обвинението беше поднесено во месец јули.

Случајот го води судијката Диана Груевска Илиевска, а застапник на обвинението е јавниот обвинител Дарко Јакимовски.

Во претходните рочишта сведочеа преживеани патници, жители на Ласкарци, возачи во „Дурмо турс“ и други сведоци.

На почетокот на судскиот процес обвинетите се изјаснија дека не чувствуваат вина.