Денес продолжува судењето за трагичната несреќа кај Ласкарци

Во Кривичниот суд во Скопје, денес е закажано ново рочиште за трагичната автобуска несреќа која се случи во февруари на автопатот Скопје-Тетово, близу селото Ласкарци. Во претходните рочишта сведочеа преживеани патници, жители на Ласкарци, возачи во „Дурмо турс“ и други сведоци.

Семејствата на дел од загинатите и повредените преку нивните правните застапници се изјаснија дека се приклучуваат на кривичниот прогон и сите најавија имотно – правно побарување на отштета.

За автобуската несреќа во која загинаа 16 лица, а 38 беа потешко повредени обвинети се шест лица. Сопственикот на „Дурмо турс“, возачот на автобусот и тројца вработени во станицата за технички преглед. Тие се товарат за тешки дела против безбедноста на луѓето и имотот во сообраќајот, додека едно лице е обвинето за несовесно работење во службата. Обвинението беше поднесено во месец јули.

Случајот го води судијката Диана Груевска Илиевска, а застапник на обвинението е јавниот обвинител Дарко Јакимовски.