Денес и утре изложби во гостиварскиот Центар за култура

Центарот за култура АСНОМ во Гостивар ќе биде средиште на љубителите на уметноста и воопшто на културата во наредните денови со оглед на најавите на повеќе настани.

Денес во 18 часот, ќе биде отворена патувачката изложба „Ана Франк – Историја за денес “ која содржи збирка од 39 изложбени панели со бројни детали од животот на малата Ана и нејзиното семејство од Втората светска војна. Изложбата ја организираат Младинскиот образовен форум и Куќата на Ана Франк од Амстердам, а е дел од проектот „Хисторија, Историја, Повјест – Лекции за сегашноста“, поддржан од Европската унија. Проектот се реализира во Македонија, Хрватска, Босна и Херцеговина и Србија.

Утревечер (петок) во 19 часот во гостиварскиот Центар за култура ќе биде отворена изложба на дела од академскиот сликар Јана Куновска. Уметницата до сега има реализирано бројни самостојни изложби во Македонија, Германија, Хрватска, Црна Гора, а била учесник е на повеќе групни изложби во земјава и странство. Покрај со сликарството повеќе години е активна и на полето на графичкиот дизајн, и за своите идејни решенија е добитник на неколку награди.

Неколку културни настани се очекуваат и следната недела.