Дерби на колото: КК Гостивар го пречекува Куманово (сабота, 17.30 часот)

Кошаркарската публика во Гостивар со нетрпение го чека утрешниот натпревар со екипата на Куманово. Гостува екипа која е голем должник на гостиварските „бело-сини“. Во минатата сезона во директен дуел за четвртата позиција во суперлигата КК Гостивар испадна од Куманово, во четвртфиналниот меч од минатогодишниот КУП гостиварци беа елиминирани од Куманово и во првиот меѓусебен дуел сезонава кумановци славеа со 75:63 во Куманово.

„Време е да се почне да се порамнуваат сметките. И многу посилни екипи ги оставале бодовите во Гостивар, не размислуваме за ништо друго освен убедлива победа на овој натпревар“, велат од КК Гостивар.

Тренерот Србиноски и играчите видно охрабрени од минатонеделната победа во Гевгелија против Кожув, максимално се сконцентрирани на следниот натпревар. Напорно се подготвуваат во студениот „Младост“ се со цел да им приредат уште едно прекрасно после пладне на гостиварската публика. На екипата и се придружи и најновото засилување, американецот Тенксли Ефаинаји, кој се очекува да дебитира во сабота.

КК Куманово се наоѓа на 7-та позиција, со 17 бодови и скор од 6 победи и 5 порази во досегашниот дел од првенството. КК Гостивар пожртвувано ја чува четвртата позиција имаат скор од 7 победи и 4 порази.

Натпреварот со Куманово се игра во сабота од 17.30 часот, МРТВ ќе врши директен пренос од Гостивар. Влезници за натпреварот може да се набават во Royal Garden и B&B Tobacco, како и на самиот ден на натпреварот на благајна.