Диви трки низ Гостивар и Тетово, 14 возила исклучени од сообраќај

Секторот за внатрешни работи Тетово информираше дека изминатите денови на полошкото подрачје биле спроведени контролни активности за спречување на организирање на диви трки, во периодот од 22 часот навечер до 3 часот наутро. При ваквите контроли, полициските службеници исклучиле 14 возила од сообраќај и истите биле упатени на вонреден технички преглед за проверка на техничката состојба и бучавост од кои кај 8 возила биле констатирани неисправности или преголема бучава. Исто така, биле констатирани и санкционирани 3 возила кои нагло ја зголемиле брзината со чкрипење на погонските тркала, нарушувајќи го јавниот ред и мир во доцните ноќни часови.

На сите возачи – прекршители им се изготвени и законски предвидените поднесоци, а техничките неисправни возила биле исклучени од сообраќајот до отстранување на неисправноста.

Активностите се во рамки на проект планот на МВР ,,Безбедно лето-2023“ со засилени контроли за поголем ред и безбедност на сообраќајот.

Со оглед на тоа дека на подрачјето видно е зголемена сообраќајната фреквенција, СВР Тетово повторно апелира до возачите да ги почитуваат законските правила и прописи во сообраќајот, поготово во касните ноќни часови и да овозможуваат нормален и проточен сообраќај и да не го нарушуваат јавниот ред и мир.

Се апелира, исто така, да не возат пребрзо и да се воздржат од чкрипење на пневматиците и други ноќни лудории со возилата на кружни текови и слично, затоа што без исклучок ќе бидат санкционирани сите нарушители за да се избегнат посериозни последици.