До кога зонското паркирање во Гостивар ќе биде бесплатно?

За користење на зонски паркинг места во Гостивар нема да се плаќа уште околу еден месец. За толку време Јавното претпријатие за паркинзи, очекува да завршат сите процедури за наоѓање на нова фирма, партнер во управувањето со паркинг-местата.

Наплатата на зонскиот паркинг се укина и паркирањето стана бесплатно на почетокот на февруари, кога претпријатието го раскина договорот со до тогаш задолжената фирма, поради како што рекоа големи финансиски штети за претпријатието. ЈП сега бара нов приватен партнер во менаџирањето.

„Тендер за избор на партнер компанија ќе биде отворен за десетина дена. Целта ни е да добиеме најдобра понуда, како што имаат другите градови Скопје, Битола, Прилеп“, изјава Музафер Зулбеари, директор на ЈП за паркинг и зеленило.

Привременото укинување на зонското паркирање создаде хаос во сообраќајот низ градот. Нема ред во оставање на возилата, а паркирани автомобили го отежнуваат сообраќајот по најфреквентните улици и булеварите.

Инаку, гостиварското Јавното претпријатие за паркинг, располага со капацитет од околу 650 паркинг места за зонско паркирање и паркиралишта од затворен тип.