Донација за пожарникарите во Гостивар на иницијатива на иселеник во Словенија, Амбасадорот во посета на општината

Гостиварската противпожарна единица доби донација од опрема и заштитна облека, обезбедена преку иселеникот Илјаз Демири од Добридол, кој живее во Словенија четири децении. Демири заедно со словенечкиот Амбасадор, Грегор Прескер и пожарникари од Словенија, денес беа гости на градоначалникот на Гостивар, Арбен Таравари.

„Амбасадорот не‘ удостои да ни дојде во посета со екипа пожарникари, а иницијатор е наш сограѓанин кој живее и работи подолги години во Маробор, Словенија. Македонија и Словенија имаат фантастични односи, а секогаш не‘ поврзуваат и многу наши луѓе кои живеат и работат таму, тоа се тие мостови коишто не поврзуваат. Им благодарам и на господинот Илјаз за оваа иницијатива и на Амбасадорот.“, изјави градоначалникот.

Ова е прва посета на Гостивар на словенечкиот Амбасадор Прескер, кој седна на  амбасадорското столче пред два месеци.

„Ме радува што имаме прилика да започнеме убава соработка со Општина Гостивар. Односите меѓу нашите земји се тесни и пријателски, секако, како што рече и градоначалникот, меѓу другото, не‘ поврзуваат и луѓето со овдешно потекло кои долги години живеат во Словенија, стануваат и наши граѓани. Се надевам на соработка и во иднина“, кажа Прескер.

Задоволство што се воспоставија релации за соработка изрази и Демири.

„Во Марибор кадешто живеам пожарникарите ми се добри пријатели. Тие изразија желба да доделат донација и јас го посочив Гостивар. И со Амбасадорот имаме добри релации и драго ми е што се воспостави оваа соработка. Ова е првична донација, скромна, но за понатаму планираме да се обезбеди и нешто поголемо“, рече тој.

Делегацијата од Словенија ја посети и Противпожарната единица во Гостивар.