ДПА одржа завршен изборен митинг во Гостивар

ДПА вечерва во Гостивар одржа завршен митинг, во рамки на кампањата за Локалните избори 2021. Во својот говор, кандидатката за градоначалник на Гостивар, Рената Елези нагласи дека Гостивар се соочува со многу проблеми, на кои им треба решение.

„Ќе се ангажирам максимално да го направиме градот и општината подобро место. Се сретнав со многу граѓани на Гостивар, во градот, многу населби и села. Сите имаат барања и потреби. Гостивар има потреба за промени, за капитални инвестиции, за конкретни проекти. Урбаниот хаос секојдневно се зголемува. Гостивар го има Вардар, а нема чиста вода. Гостиварци сакаат да бидат безбедни, а не загрозени од кучиња скитници. Гостивар има потреба за чист воздух, а не граѓаните да дишат загаден воздух од Русино и други диви депонии. Гостивар има потреба од фабрики, за младината да не бега во странство. Се кандидирам и како градоначалник ќе бидам целосно во служба на граѓаните“, рече Елези.

Глас од граѓаните на изборите во недела за кандидатката и за листата на советници од ДПА во Гостивар, побара претседталот на партијата, Мендух Тачи. „Ние сме насочени само кон интересите на граѓаните и нашиот кандидат Елези и советничката листа се вистинскиот избор за вас“, рече Тачи.