ДУИ по прегрупирањето во Советот: Таравари сега нема простор за изговор и манипулација

По промената на силите во Советот на Општина Гостивар, која се случи на денешната седница, со соопштение се огласи гостиварскиот огранок на ДУИ.

„Денес заврши скоро двегодишниото жалење на Арбен Таравари за наводна опструкција од страна на мнозинството во општинскиот совет. Претседателот Насир Муслиу поднесе оставка, отворајќи пат за избор на нов претседател, кој беше изгласан со помош на ВМРО-ДПМНЕ и советникот Ром, кој беше во коалиција со оваа партија, на последните локални избори. Ова назначување, за жал не беше донесено со волја на мнозинството албански советници и изборот на албанските граѓани на последните локални избори. Отсега Таравари нема простор  за жалење, изговори и манипулација со јавното мислење. ДУИ ќе продолжи да ја разоткрива и  осудува политиката на локалната самоуправа во Гостивар и во иднина.“, се наведува во соопштението на интегративците.

На денешната седница, Насир Муслиу од ДУИ даде оставка, по што за нов претседател беше избран Бесим Мемеди, од Алијанса за Албанците. Неговиот избор го поддржа советникот од Демократски сили на Ромите, Кашмир Салиу, кој до сега во Советот делуваше во коалиција со ДУИ и СДСМ.