Екс директорот на медицинско најавува тужба: Таравари лаже, ќе докажам на суд

Поранешниот директор на средното медицинско училиште во Гостивар, Агрон Алили ги демантира обвинувањата кои вчера на негова адреса ги упати градоначалникот Арбен Таравари и најави дека ќе покрене тужба за лажни изјави.

„Не е вистина дека јас сум ангажирал професор за часови по екстерно тестирање, за фотокопирање и за фејсбук. Тврдам дека не е точно, а доколу тој може да докаже дека е така јас сум подготвен да дадам оставка од моето работно место како професор. Но, истото би му го порачал и нему, ако се докаже дека изнел невистини, градоначалникот да си даде оставка. Тоа што сум ангажирал како професор по информатика човек со завршен факултет за бизнис, беше краткорочно, како замена за отсуство поради породилно. Што се однесува до соодветноста на кадарот, јавноста треба да знае дека истиот тој градоначалник има поставено на позиции луѓе апсолутно несоодветни. Нивната советничка која има завршено биохемија е примена да предава предмети како гинекологија, анатомија, невропсихијатрија. Најверојатно од понеделник ќе поднесам тужба за лажни изјави и подготвен сум да се докажуваме на суд“, рече Алили нагласувајќи дека додека го водел училиштето биле направени повеќе инвестиции, пораснал бројот на ученици и слично.