Македонија ги доби противниците во новото натпреварување Лига на Нации

Новото натпреварување на УЕФА кое започнува во септември годинава им дава шанси и на послабите репрезентации да се пласираат на Европското првенство во фудбал 2020 година.

Најдобрата македонска репрезентација првиот натпревар во Лигата на нации на УЕФА ќе го одигра на 6. септември против Гибралтар на гостински терен. На 9 септември првиот домашен натпревар го играме против Ерменија. На 13 октомври ни доаѓа Лихтенштајн, а три дена подоцна гостуваме во Ереван против Ерменија. Ноемвриските пресметки ги играме на 16 и 19 ноември. Прво гостуваме во Лихтенштајн, а натпреварувањето го затвораме дома против Гибралтар.

Ова натпреварување на УЕФА ќе се игра во термините предвидени за пријателски натпревари, а учествуваат 55 репрезентации од Европа, поделени во четири групи согласно коефициентот на УЕФА. Победниците од групите Б, Ц и Д ќе изборат пласман во ранг погоре, а најдобрите четири од А групата ќе играат завршен турнир за титулата.