Ексклузивно: Судија од гостиварскиот суд и‘ го спасил животот на жена што ја сослушувал

Вистинска драма како на филм се случувала вчера доцна попладне во Основниот суд во Гостивар, каде со храбра и брза интервенција на судијата на претходна постапка, бил спасен човечки живот.

Судијата ја сослушувал 35 годишната жена во врска со пожарот во кој настрада нејзинот 7 годишен син. Како што дознаваме од наши извори, по сослушувањето жената добила епилептичен напад, паднала на подот, го голтнала јазикот и почнала да се гуши. Судијата без двоумење реагирал веднаш, присебно и‘ пружил соодветна помош и успеал да ги ослободи дишните патишта и да обезбеди проток на воздух, спасувајќи ја од сигурна смрт.

На местото пристигнала екипа од Итната помош, која дала соодветна терапија и ја транспортирале жената до гостиварската болница. Откако била целосно стабилизирана, била вратена во судот, го примила решението за 30 дневен притвор и била спроведена во затворот во Скопје.

Од Итната помош потврдија дека интервенирале во судот и дека кога пристигнале жената не била во животозагрозувачка состојба.