Етно вешта жена во гостиварско Зубовце – старински специјалитети, чист воздух и дружење

Гостивар годинава беше домаќин на манифестацијата Етно вешта жена и на едно место собра жени од сите градови во Македонија, кои го претставија својот крај со специјалитети, подготвени по старински традиционални рецепти. Настанот се одржа во дворот на манастирот „Света Марина“ во селото Зубовце.

„Се радуваме што сме домаќини на Етно вешта жена и ете успеавме и во услови на пандемија со почитување на протоколи, да ја организираме манифестацијата. Благодарност до сите жени кои учествуваат со свои специјалитети, дојдоа од различни градови, од овде заедно да пренесеме една позитивна енергија, која навистина недостигаше долго време“, рече координаторката на Вешта жена за Гостивар, Мирјана Србиноска.

Секој град имаше посебен штанд за изложување на подготвените јадења: разни пити, погачи, кифлички, колачи и слично, кои присутните моежа да ги вкусат и купат. Средствата собрани од продажбата на храната се наменети за манастирот во Зубовце.

„Етно вешта жена има мисија да ги шири вистинските вредности, на заедништво, на зачувување на семејството, негување на традициите и горди сме што во тоа успеавме и денес овде во Зубовце. Местото е прекрасно, и особено не‘ радува што има убава природа и чист воздух, кој на сите ни треба и го сметаме за најголем подарок.“, подвлече Снежана Стојаноска-Жана, претседател на Здружението Вешта жена.

На манифестацијата беа доделение благодарници за соработници, поддржувачи и донатори, како и дипломи и награди за вештите жени.

Претставничките од здруженијата од градовите каде до сега не се одржувал ваков настан, кршеа погача, а паричката падна во претставничката од Кочани, што значи дека овој град  следниот пат ќе биде домаќин на „Етно вешта жена“.