Затруени кучиња скитници во Гостивар, утрово глутници нападнале две жени

Вознемирувачко неделно утро за граѓаните на Гостивар кои живеат во близина на автобуската станица. Како што раскажуваат, во реонот утрово се случиле два напади од кучиња скитници врз жени минувачи, а истовремено забележале и неколку затруени животни.

Жителите велат дека во околината се собираат голем број на бездомни кучиња, кои најчесто се движат во групи и неретко напаѓаат. Тие се згрозени и го осудуваат чинот на труење и бараат институциите соодветно и во рамки на надлежностите да го решат проблемот со кучињата.

„На овој простор се собираат по 30-тина кучиња, а не сме виделе некој нешто да презема. Никако не е решение кучињата да се трујат и да се мачат, го осудуваме таквиот нехуман чин, но сметаме дека институциите итно треба да го решат проблемот со кучињата, навистина се голема опасност и често напаѓаат“, рекоа граѓаните.