Фестивалот „Отело“ во Гостивар се отвора со „Народен непријател“ на МНТ

Во понеделник (9-ти октомври) почнува седмото издание на Меѓународниот театарски фестивал „Отело“ во Гостивар. Фестивалот ќе биде отворен со претставата „Народен непријател“на Македонскиот народен театар (МНТ), а во рамки на фестивалските вечери ќе бидат изведени уште пет претстави на театри од Македонија, Албанија, Бугарија, Србија и Косово.

„На „Отело“ годинава ќе се претстават три народни театри, МНТ и Народните театри од Косово и Албанија, како и три други државни театри од Лесковац (Србија), Габрово (Бугарија) и Тетовскиот театар. Им се заблагодаруваме на сите. Ова е нешто навистина големо за Гостивар и не е лесно да се донесат такви театри, тоа бара многу работа, посветеност, процедури, ангажирање од страна на нашата екипа. Нашиот фестивал веќе е поставен на високо ниво и тоа се препознава“, рече на денешната прес-конференција, Арѓенд Хасани, директор на манифестацијата.

Меѓународниот театарскиот фестивал „Отело“ има натпреварувачки карактер во неколку категории.

„Веќе е познато дека фестивалот доделува четири награди, така почнавме од почеток, така и продолжуваме. Наградите се: најдобра претстава, режисер, актер и актерка.“, потсети  Берат Салиу, продуцент на фестивалот.

„Отело“ го организира истоименото здружение од Гостивар, со поддршка од Министерството за култура, Центарот за култура АСНОМ и спонзори.

Фестивалот ќе трае до 15-ти октомври, сите претстави се играат на сцената на Центарот за култура со почеток во 20 часот, а влезот е бесплатен.