Горнореканци на протест и блокада во Маврово: Се случува еколошка катастрофа

Жители на села во Горна Река утрово излегоа на протест и го блокираа патот Гостивар – Маврово кај влезот во националниот парк (крстосница Бунец). На овој начин, сакаат да изразат револт поради, како што наведоа, еколошка катастрофа на планината Мелник од нелегална сеча и непреземање мерки од институциите.

„Од наша страна, констатирано е дека незаконското сечење на дрвјата се случува на приватен имот и од лица кои не се евидентирани од работодавачот. За жал, Државниот инспекторат за животна средина го одби нашето известување и барање да излезат на лице место за да ја видат оваа еколошка катастрофа додека бесрамно ја оправдувааат акцијата на Националниот Парк Маврово. Исто така, заради оваа еколошка катастрофа нашата ” Длабока Река ” може да го изгуби статусот на заштитено подрачје од страна на УНЕСКО. Бараме од надлежните институции да преземат мерки против соодветната институција која врз основа на законот е формирана за зачувување на автентичната состојба на природата преку заштита на природните вредности. Оваа еколошка катастрофа и овој организиран криминал нема лесно да помине и дека сторителите на криминалот мора да одговараат пред надлежните институции“, истакнаа од Здружението за рурален развој „Преродба на Горна Река“ кои го организираа протестот.

Од Здружението информираа дека за случувањата ги известиле институциите, како и странските амбасади во земјава.