Гостиварци без посебно предновогодишно расположение, славењето во сенка на кризата

На десетина дена пред дочекот на Новата година во Гостивар не се чувствува, ниту се забележува некоја посебна предпразнична атмосфера. Секојдневната глетка низ градските улици делува вообичаено, без да може да се насети новогодишно расположение. Во централното подрачје денес околу пладне, како и во други периоди од годината: раздвиженост, погуст сообраќај и луѓе кои брзаат да си ги завршат обврските. Бевме меѓу гостиварци во обид да доловиме дали кај нив се наѕира новогодишен дух, планираат ли прослава за најлудата ноќ и колку актуелната криза им го дозволува тоа.

Поголемиот дел од граѓаните со кои поразговаравме рекоа дека 2023-та година ќе ја дочекаат дома, скромно, оти семејниот буџет не стига за кафеански прослави или патувања.

„Кризата многу не‘ погоди сите и мислам дека нема семејство што не‘ трпи последици. Се мачиме да го скрпиме месецот, да ги платиме сметките, да има за јадење, за децата, само за основни работи. Во вакви улсови нема за ништо повеќе, па ни за славење Нова година. Ќе се собереме дома на скромна трпеза, како и секој ден. Порано беше поинаку, остануваше по некоја пара, па ќе се собереше и да појде човек некаде, да се почести, да прошета. Сега каде и како со 300 евра плата или пензија“, кажа повозрасен гостиварец.

Слични беа одговорите што ги добивавме и од другите соговорници кои ги сретнавме на плоштадот денес. Ретко некој имаше поинакво мислење, како на пример граѓанин кој рече дека кризата не е нешто ново, а луѓето се учат да се прилагодуваат: „Кој сака да слави, ќе најде начин да слави. Кризата не е од сега, ние живееме во криза повеќе од дваесет години, луѓето се навикнуваат и се снаоѓаат. Не дека е лесно, ама туркаат. Јас за сега немам некои планови како ќе ја дочекам Новата година, има време, рано е“, рече тој.

Периодов се очекува во Гостивар да пристигнат печалбарите кои носат некакво финансиско освежување и заживување на локалната економија. Каква новогодишна сезона ќе биде ова за Гостивар, по две години пандемија, сепак, останува да се види.